VAMANANA LAVA HA RIKI VANTSHWA NI KU AN’WISA

Tanihi manana la nga muntshwa, u nga ha tivutisa leswaku u ta swi kota njhani ku khathalela n’wana, ku n’wi an’wisa ni ku tlhelela exikolweni. Ku an’wisa i ndlela yo olova, leyi tsakisaka ya leswaku wena ni n’wana wawena mi tivana. Ku an’wisa hambi ku ri kwihi ka antswa ku tlula ku nga an’wisi nikatsongo.

I SWA NKOKA LESWAKU VAMANANA LAVA HA RIKI VANTSHWA VA AN’WISA

Ku va manana swi katsa swilo swotala – ku an’wisa swa olova naswona a swi koxi mali.

Vana lava an’wisiwaka a va tali ku vabya – a wu tshameli ku vilela, a wu heti nkarhi wotala uri karhi u ya etliliniki ni ku xwa exikolweni kumbe u khumbuka vanghana.

Ku an’wisa swi ku pfuma leswaku u twisisa n’wana wawena naswona swi endla leswaku u va ni tshembo tanihi manana.

Ku an’wisa a swi karhati: u nga swi endla kun’wana ni kun’wana, nkarhi wun’wana ni wun’wana naswona mafi yawena ma tshama ma ri eka mahiselo faneleke.

U nge yi enkarhini loko u an’wisa kotala, miri wawena wu ta hunguteka hi ndlela ya ntumbuluko.

LOKO U SUNGULA KU AN’WISA

Swi nga ha endleka u nga tiyiseki leswaku u ta an’wisa nkarhi wo tanihi kwihi. Swi ringeti masiku kumbe mavhiki mangari mangani.

Ku an’wisa swi nge endli leswaku mavele yawena ma bohla – ana se mavele yawena ma cince xivumbeko ni vukulu hi nkarhi wa vuyimani.

Vulavula ni munghana kumbe munhu un’wana loyi u n’wi tshembaka loyi anga an’wisa n’wana hilaha ku humelelaka.

A wu fanelanga u twa kuvava loko u an’wisa – kombela mpfuno loko u tikeriwa kumbe u twa kuvava loko u an’wisa. Loko u an’wisa u tshame kahle naswona n’wana a nghenise nomu hikwawo eka vele, tinhlungu a ti nge vavi.

Loko u an’wisa n’wana wawena kotala, u tava ni mafi yotala. Tshika n’wana wawena a an’wa kotala naswona ringeta ku heta nkarhi wotala uri karhi u tolovela ricece rawena.

KU TLHELELA EXIKOLWENI

Loko u endla xiboho xa ku tlhelela exikolweni, ringeta ku tlhelela endzhaku ka tin’hweti timbirhi. Swi tikomba onge n’wana wawena u ta va a ri ni leswi a nga ta va a swi toloverile endzhaku ka nkarhi wolowo naswona swi ta ku olovela ku kunguhata siku rawena.

Loko u ya emahlweni no an’wisa loko u tlhelela exikolweni, u nga kama mafi ivi u ma siya ni muhlayisi wa n’wana. U nga ha sungula ku titoloveta mavhiki mangari mangani u nga si tlhelela exikolweni.

Kunguhata ku heta nkarhi wokarhi ekaya ni n’wana wawena loko u huma exikolweni, u tlhela u tinyika nkarhi wo dyondza no heta nkarhi ni vanghana.

Ku va ni n’wana ni ku ya exikolweni swi ta olova hi ku famba ka nkarhi.

Vamanana lava ha riki vantshwa va lahlekeriwa hi vanghana loko va va ni vana, kambe va tlhela va kuma van’wana vanghana. Tihlanganise ni vamanana kumbe vanghana van’wana lava nga ta ku seketela.