U KWAMANA LUKANDA

U kwamana lukanda ndi nḓila ya u ṱhogomela ṅwana waṋu. Takulani ṅwana o ambara ḽeri fhedzi ni mu vhee kha maḓamu aṋu. Vhomme vha nga kwamana lukanda na vhana vhavho musi vha tshi thoma u vha mamisa, musi vha tshi dovha u vha mamisa kana tshifhinga tshiṅwe na tshiṅwe musi inwi kana ṅwana waṋu ni tshi ṱoḓa u ita nga u ralo.
 

NDI ZWA NDEME U KWAMANA LUKANDA NA ṄWANA WAṊU NGAURI:

  • Zwi ita uri ṅwana waṋu a ḓipfe o tsireledzea.

  • Zwi ni thusa uri ni ḓivhe ṅwana waṋu na u khwaṱhisa vhushaka.

  • Zwi ita uri inwi na ṅwana waṋu ni dzike. 

  • Zwi ita uri ni vhe na mikando minzhi.

  • Zwi thusa u engedza tshileme tsha vhana.

  • Zwi thusa vhana uri vha dzule vhe na swigiri yo linganelaho malofhani.

  • Zwi nga dzikisa ṅwana ane a khou lila.

  • Zwi thusa u ita uri mbilu na mafhafhu a ṅwana zwi dzule zwi tshi shuma nga nḓila ya nzulele.

  • Zwi thusa uri mufhiso wa ṅwana u dzule wo linganela nahone arali ni na mafhaṱa, no a vhea kha maḓamu zwi ita uri ḓamu ḽiṅwe na ḽiṅwe ḽi dudele, zwenezwi ndi zwine zwa ṱoḓiwa nga mafhaṱa.

  • Arali ṅwana waṋu o bebwa tshifhinga tshi sa athu swika kana e muṱuku vhukuma, u dzula ni tshi kwamana lukanda zwi nga tshidza vhutshilo hawe.

  • U kwamana lukanda zwi thusa u dzikisa vhana.

 

Na vhokhotsi vha nga kwamana lukanda na vhana!

 

ḒILUGISELENI U KWAMANA LUKANDA

  • Bvulani hemmbe na bodi yaṋu. Bvulisani ṅwana zwiambaro zwoṱhe. Ni mu sie o ambara ḽeri fhedzi.

  • Arali kamara i tshi khou rotholela, ni nga ḓifukedza nga nguvho.

  • Vheani ṅwana vhukati ha maḓamu – ni kwamane nga khana. Milenzhe na zwanḓa zwa ṅwana zwi khothee sa kuḓula.

  • Ni ite vhungoho ha uri ṅwana u a kona u fema – marama awe o kwama lukanda lwaṋu. Ṱhoho ya ṅwana i tsini lune na nga kona u mu khisa.

  • Dzulani kha tshidulo kana kha mmbete. A hu ṱoḓei misiamelo kana nguvho dzo engedzeaho tsini na ṅwana.

 

U KWAMANA LUKANDA U ITELA MUBEBI NA ṄWANA MUṄWE NA MUṄWE

Zwo tsireledzea? Ee, arali inwi na ṅwana waṋu no dzula zwavhuḓi, hu si na nguvho kana misiamelo yo engedzeaho.

Naa ni nga ita zwa u kwamana lukanda na mafhaṱa? Ee, ṅwana muṅwe na muṅwe e kha ḓamu lawe, ni nga kha ḓi kwamana lukanda.

Ndi nga ita mini arali ndi sa ḓipfi zwavhuḓi? Vhudzani muṅwe muthu arali ni sa ḓipfi zwavhuḓi lune na nga takula ṅwana waṋu.

Ndi nga ita mini arali ṅwana’nga o bebwa tshifhinga tshi sa athu swika? Ni nga kwamana lukanda u thusa uri ṅwana waṋu a dzike.

Ndi tea u thoma lini u kwamana lukanda na ṅwana? Ni nga thoma musi ṅwana a tshi tou bebwa.

Naa ndi nga bvela phanḓa u kwamana lukanda na ṅwana musi o no aluwa? Ee, u kwamana lukanda ndi zwa ndeme na musi vhana vho no aluwa.

Naa u kwamana lukanda zwi thusa u bveledza mikando minzhi? Ee, u kwamana lukanda zwi nga thusa ṅwana waṋu uri a ni dzhenise ṱhungu mulomoni, a mame khwine. Arali ṅwana a mama musi no kwamana lukanda, ni ḓo vha na mikando minzhi.