U HAMULA MIKANDO NGA ZWANḒA

U hamula mikando nga zwanḓa ndi vhutsila vhune vhomme vhane vha khou mamisa vha nga vhu guda. Vhomme vhanzhi a vha na bommbo ya maḓamu. Vha hamula mikando nga zwanḓa vha tshi itela vhana vhavho. Maḓamu aṋu o no ḓowela vhududo ha u kwamana lukanda na ṅwana, nga zwenezwo zwanḓa zwaṋu zwi nga si tate u kwama lukanda lwa ḓamu nahone zwi nga kha ḓi konadzea uri hu bve mikando minzhi musi ni tshi hamula. Shumisani zwanḓa zwaṋu fhedzi!

 

ZWIITISI ZWA U HAMULA MIKANDO NGA ZWANḒA

Mikando yaṋu ndi zwiḽiwa zwavhuḓi vhukuma zwa ṅwana waṋu. Zwi nga kha ḓi ṱoḓea uri ni hamule mikando nga zwanḓa:

  • arali ṅwana o bebwa tshifhinga tshi sa athu swika nahone a sa athu kona u mama.

  • arali ṅwana a tshi khou lwala nga maanḓa lune a si kone u mama zwavhuḓi.

  • arali maḓamu aṋu o zwimba mikando nga murahu ha u beba nahone ni tshi ṱoḓa u fhungudza mutsiko kha maḓamu.

  • arali ni tshi khou ṱoḓa uri ṅwana waṋu a wane mikando minzhi.

  • arali ni tshi ḓo vha ni kule na ṅwana waṋu nahone ni tshi ṱoḓa u mu siela mikando.

Kanzhi vhomme vha hamula mikando minzhi nga zwanḓa u fhira musi vha tshi shumisa bommbo.

 

MAITELE A U HAMULA MIKANDO NGA ZWANḒA

Kheyi nḓila i leluwaho ya u hamula mikando:

  • Tsha u thoma, u hamula mikando i si gathi zwo luga. Vheani tshigoḓelo tshihulwane kha zwirumbi uri ni kone u anekedza mikando, nga murahu ni shumise kha tshigoḓelo tshiṱuku, ni shumise khapu musi zwi tshi vho ni lelutshela. Vhaṅwe vhomme vha vho zwi kona lune nga murahu ha tshifhinganyana vha vhea khapu nga fhasi ha ḓamu ḽiṅwe na ḽiṅwe vha hamula mikando nga tshifhinga tshithihi. Ni vhee thaula tsini uri ni kone u phumula mikando ine ya nga kha ḓi hasekana.

  • Nga zwanḓa zwo kunaho, thomani nga u phaphatha na u khusa maḓamu ni kokodze zwavhuḓi ṱhungu.

  • Vheani gunwe na musumbavhaloi hu ṱoḓaho u vha sentimithara nthihi nga murahu ha ṱhungu. Hezwi ni nga kha ḓi zwi ita kha areola kana hai (ṋama ntswu ya kha lukanda lwo monaho na ṱhungu). Itani uri minwe yaṋu i ite tshivhumbeo tsha C ni songo hamula maḓamu (lukanda vhukati ha gunwe na musumbavhaloi lu songo thivha ḓamu; hu tea u vha na tshikhala).

  • Sukumedzani ḓamu uri ḽi ye khanani.

  • Monisani minwe u tou nga ni khou gandiswa mitalo ya kha minwe.

  • Dovhololani zwenezwi nga u tou tevhekana.

  • Ni ḓo zwi vhona uri no vhea minwe fhethu ho teaho musi ni tshi vho thoma u vhona mashotha a mikando, nga murahu ya hasha nahone ya thoma u bva zwavhuḓi.

  • Ni tse na ḓamu u mona na migero yaḽo ni songo zwi ita fhethu huthihi fhedzi.

  • Ni songo pandaladza minwe, u hamula, u tseremudza minwe, u kokodza ṱhungu ngauri arali na ita zwenezwo ni ḓo pfa vhuṱungu na u vhaisala.